حطم قيود الخوف

الـشـامـخ · 09-08-2008, 06:44 AM

كنت -كالعادة- أستعرض النت, وبالتحديد منتديات تطوير الذات..
أخذ من هنا فكرة.. ومن هنا قصة.. ومن هناك كلمة محفزة..

المهم, وأنا في الحالة من الإيجابية.. قرأت مثل هالمواضيع:

هذا المرض يقتلني
ساعدوووووووووووووني وإلا انتحرت
كرهت الحياة بسبب هذا الجحيم..

بصراحة قريت مواضيع كثيييييرة مثل هذي
وكلها عن الفيروس النفسي المستشري بين
الذكور و الإناث بإختلاف جنسياتهم

واللي هو
عن

الرهاب الإجتماعي

استجمعت قواي الفكرية.. بعد أن استعنت بالله..
لأنطلق في رحلة تقوية وتعزيز لنفس كل مجروح ومهموم
بهذا الخوف..

فكان أن خرجت بهذا الموضوع
والذي أتحدث فيه عن تحطيم قيود الخوف بداخلك..

آمل منك الاستفادة.. وتزويدي بقصتك بعد قراءتك
للموضوع.. أريد أن أعرف ماذا استفدت؟؟..<< هذا الموضوع يهمني كثييييييراً

الموضوع سيكون في أربعة أجزاء.. وستكون السرعة في إدراج الأجزاء بحسب التفاعل..
أرجو لكم قراءة ماتعة.. واستفادة عظيمة

وبالمناسبة..الموضوع طويل شوي ومثيييييييير ومهم جداً
ويحتاج لشيء من الرواقة

فإلى الجزء الأول

الـشـامـخ · 09-08-2008, 06:45 AM

الجزء الأول

كثير من الناس اليوم يعاني من الخجل أو الخوف من الكلام مع الناس ويحس ان ما عنده ثقة بنفسه..
والأكيد انه ما علم أحد من عائلته او أقاربه.. بس كاتم هالموضوع في نفسه.. وتلقاه كل يوم وكل ساعة وكل دقيقة يتمنى يحصّل الشخص اللي يحل له هالمشكلة
.. يعرف ان فيه أطباء نفسانيين بيديهم بعد الله سبحانه وتعالى الحل.. بس المشكلة كيف يروح لهم؟.. يقول لاهله؟؟؟؟..صعبه.. راح يقولون عنه مجنون..
لأن الطبيب النفسي مرتبط في عقلية كثير من الناس انه ما يعالج إلا المجانيين بس.
فيه حل ثاني وهذا الحل يناسب الذكور اما الإناث فللأسف ما عندهم إلا الحل الأول (أتمنى من الأخوات الكريمات ما يوقفون هنا لأن ما فيه حلول
..لا..لا.. كملوا القراءة وراح تشوفون اللي يرضيكم – بإذن الله-)
نرجع للحل واللي هو انه يروح للطبيب النفسي بدون ما يعلم اهله.. المشكلة هنا مع الشباب يا إما إنه ما يعرف يسوق أو انه حاسب حساب المبلغ اللي راح يدفعه والمواعيد اللي يتعب معاها..
فما يحصل قدامه إلا إنه يصبر.. ويتحاشى المواقف الإجتماعية بالتصريفات اللي تمشي بعضها على اهله.. وبعضها والله ما تمشي على بزر..

راح تقرأ في هالموضوع اللي عمرك ما قريته.. راح تشوف أفكار عمرك ما سمعت عنها..
راح اقدم الموضوع بطريقة سهلة وبسيطة بعيد كل البعد عن الكلام والأسلوب الأكاديمي.. بس أهم شيء عندي انك توعدني وتوعد نفسك انك راح تطبق الكلام الموجود هنا..
هالكلام مو كلام انسان عادي.. الكلام اللي راح تقراه هو خلاصة قراءة طويله في مجال تطوير الذات.. وهو بعد خلاصة استماع وتواصل مع الخبراء في هالمجال اللي ماهو بوقته اللحين إني أذكر لك أسمائهم..

أبدأ متوكلاً على الله مستعيناً به

أول شيء لازم نعرفه هو.. وش اهمية الثقة بالنفس؟ يعني وش الفايدة لو صرت واثق من نفسي؟
يا كرام أنا أشوف ان أهم صفتين في بناء أي إنسان الثقة بالنفس والشجاعة.. هالصفتين هي اللي تعتمد عليها باقي الصفات الإنسانية..
اما لو ان فيك كل الصفات الزينة وأنت معدوم الثقة بنفسك صدقني ما راح تشعر بطعم الحياة صح..
ما راح تطمح للنجاح.. ما راح يكون عندك شخصية المغامر.. اللي طريق النجاح يحتاج واحد عنده هالشخصية.. وصدقني لو قويت ثقتك بنفسك أشياء كثيرة وكثيرة وانتقالات عظيمة راح تصير في حياتك.. وأنت راح تحس بهالشي لما تنتهي من قراءتك لهالموضوع..
مافيه تصرف في الحياة إلا يحتاج هالصفتين اللي ذكرتها واللي هي الشجاعة والثقة بالنفس.. وسبحان الله العظيم إذا كنت شجاع راح تكون واثق من نفسك على طول..
والعكس كذلك.. يعني لو انك واثق من نفسك راح تكون شجاع..وبكذا تركيزنا في هالمقالة على الثقة بالنفس.. يعني وسط المقالة وقبل ما تنهيها راح تحطم القيود والسلاسل اللي ما خلتك تنطلق للحياة واثق من نفسك وشجاع..

بعدما عرفنا أهمية الثقة بالنفس وانها أساس كل تصرف وكل فعل ناخذه في الحياة..
اللحين راح نطب في الغويص.. راح نتعرف على اسباب نقص ثقتنا بأنفسنا علشان نعرف نحلها..
وبكذا ما يكون عندنا أي سبب يمنعنا من الثقة بأنفسنا.. وهذا معناه اننا راح نسبح في الحياة بعد ما كنا أول واقفين على شاطي الحياة نتفرج وبس..
أول شيء هنا لازم نعرفه ان الحياة زي ما يقولون ثلاثة أيام: اليوم وبكرة وأمس.. اليوم اللي نقصده هنا هي اللحظة اللي إحنا عايشين فيها الآن..
وهذانا عايشين ولله الحمد وجالسين اللحين نقرأ المقالة في أمان من الله وصحة.. لو انا خايفين أو نعاني من مرض شديد كان ما لقيتنا جالسين نقرا.. بتحصل نفسك قلقان
أو انك على سريرك أو في مستشفى الله يبعد عنا وعنكم الشر وعن المسلمين.. هذا الكلام بالنسبة لليوم..
أما بالنسبة لبكرة.. في علم الغيب لا أنا ولا أنت ولا أحد من هالخلق يعرف وش راح يصير له بكرة.. بقي اليوم المهم واللي هو السبب في نقص ثقتنا بأنفسنا اللي هو أمس.. اللي اقصده بالأمس.. هو أمس والأيام اللي قبله.. يعني الماضي.. الماضي اللي نقصده هنا هو أي وقت مضى
يعني الساعة والدقيقة والثانية اللي قبل شوي تعتبر من الماضي.. بعد ما عرفنا الأيام اللي في الحياة
و انها ثلاثة.. راح ارجع لها بعد شوي.. بس لازم نعرف قبل ان اسباب نقص ثقتنا بأنفسنا إما بسبب التربية اللي تربينا عليها أو بسبب موقف محرج تعرضنا لها في حياتنا..
وأبيك اللحين تتذكّر المواقف اللي تعتقد انت انها السبب في نقص ثقتك بنفسك.. لازم يكون فيه موقف أو أكثر.. أنت تذكّر وراح يجيك الموقف او المواقف اللي من بعدها صارت ثقتك بنفسك مهزوزة.. لازم تعرف هالمواقف أو المواقف اللي تعرضت لها في حياتك.. أول طريق لاكتساب الثقة هو انك تعرف اسباب انعدامها حتى تزيلها.. الأفضل انك تكتب هالمواقف اللي تعرضت فيه لنقص الثقة بالنفس..
بعدما تكتبها.. تعال للتغيير.. تعال للكلام الجاد والحقيقي اللي راح يطورك للأفضل..

إذا ما كتبت أرجوك لا تكمل لأنك ما راح تستفيد شيئ.. راح تضيع وقت
بإمكانك الإستفادة منه بشيئ آخر..
أما إذا كتبت فكمل وراح تقرأ اللي يروي عطشك بإذن الله في الجزء الثاني

محبك