حلقة وجع

محمد أحمد عسيري · 15-07-2008, 12:06 PM

اسعد الله كل اوقاتكم ..

اليوم راح احكيلكم رواية بالعامية راح تتعسكم شوي واعذروني لاني ما احب حكايات الفرح ، والي بيسألني ليه ؟ راح اقوله : ممكن علشانها مزيفة وقليلة وممكن لانا من زمان نسينا الحكايات هذي .
ابطال حكايتنا اليوم مشهورين كثير وموجودين في كل بيت من بيوتنا ، صداهم يتردد عام بعد عام ولأن العام بالنسبه لهم هذي بدايته حبيت اشاركهم همومهم من بدري والرزق على الله .

ابطالنا اكثر فئة كانت تحلم بمستقبل مشرق ، رسمو احلامهم على جدران غرفهم ولونوها بتعبهم وسهرهم وكلنا كنا نتظر بكره علشان نرفع يدينا ونصفق لفرحهم ونقولهم مبروك لكم ومبروك الف مرة لوطنكم .

ابطال حكايتنا يا سادة يا كرام اكثر من شكر ربه لما قالوا فتحنا جامعات جديدة وما في داعي احد يترك اهله ويتبهذل .
اكيد عرفتوهم ، خلونا نكمل الحكاية والرزق على الله

فتحوا الجامعات .. وبدينا المشوار معاهم ، بس مشوار قصير ما كان يشيل همه ، صحيح ان التعب كان قليل بس بكره راح نتعب اكثر .. تخيلوا معي كل الاحلام في لحظة تضيع منك ، تعبك وسهرك وشوق ابوك وامك يشوفوك رافع راسهم والسبب ما في مقاعد لابطال حكايتنا ، طيب ليه ؟

النسبه يا سادة دون المطلوب ، ورجعوا الابطال مهزومين ومن اول جولة ، ويروح العام ويجي الي بعدهم ولكل عام له حكاية وله ابطال جدد ، وعام بعد عام تكبر الحكاية ويظهر في كل فصل بطل جديد .

ممكن تتخيلوا معي شوي ايش نهايتهم ؟
كيف بتكون الحكاية في المشهد الاخير ؟

ابطالنا في يوم فكروا انهم بيكونوا عاله وثقل على اهاليهم ، وقرروا انهم يغيبوا شوي عن المشهد ، دخلوا خلف ستارة لونها اسود ، خلف الستارة هذي اصوات ضجيج وصريخ ودم ورعب واطفال تركض وهي تبكي و مشاهد مفزعة للغاية .

خلف الستارة ابطالنا مذهولين ، وفي وسط الذهول امتدت لهم يد بشعه كثير بس كانت متنكرة بالحنان ، طبطبت عليهم وضمتهم وعطتهم وجع !! ايوه وجع بس ، وجع بدون نسبة ولا معدل وما يحتاج مقعد وقلم ونور للمستقبل ..
وجع مجاني .. حزام ناسف ينسيك همك ووطنك ويخليك تكسب جنة من نسج خيالهم .
خلف الستارة الملعونة راحوا ابطال حكايتنا وكنا محتاجينهم معانا وشفنا المشهد يتكرر في افغانستان والعراق واخيراً لبنان ويا عالم بكره وين وفين يتكرر .

بخلنا عليهم بمقعد ثمنه قليل ، بخلنا عليهم يتعلموا ويساعدو اهلهم ويرسموا بسمة طاهرة نقية على وجوه اخوانهم .
ممكن احد يقولي مين السبب ؟ مو لازم نحكي المهم نحس فيهم نساعدهم ونطبطب عليهم بصدق .

هذي حكايتي اليوم اتمنى تكون عجبتكم ممكن تكون تعيسه بس صدقوني فتشت وما لقيت غيرها ، ربنا بكره يفرجها ونحكي افضل منها .

صورة مع التحية لوطني وابطال حكايتنا .. (انتم في ذمتهم ) !!

عذراً لسوداوية الصورة التي حاولت أن ارويها كما هي مع بعض الرتوش التي تزين اطارها المكسور وعذراً لكل من لا يرغب في قراءة مثل هذه السطور فما عليه الا أن يبحث عن حكاية اخرى هزلية ربما تميت قلبه ضحكاً