 جديد الشعر ( لكم فقط )
معقول اغيّرعقول الخلق واقنعها؟
ماهو بمعقول ياللي قلت : معقوله
ياخي انا يالله بنفسي اطوّعها
مالي على الخلق لا حكم ولا طوله
ياالأجودي لو بنفسك شيّ موجعها
هالوقت غيّر كثير نفوس بسهوله
نفس ٍذليله تشوف المال يرفعها
ونفس ٍعزيزه تركها الفقر مذلوله
وناس يجيها اللحّاف بطقّة اصبعها
ياللي يمدّد بقدّ لحافه رجوله
اثبت لك إنّا مع انفسنا نخادعها !
وإنّا نعيش الهزيمه كنّها بطوله !
نقول دنياك لو ماطاعتك طعها
وهي عمرها ماتطيع الحيّ بميوله
وبإسم الرجوله عقب مالوقت شيّعها
قمنا نكابر بوقتٍ مابه رجوله
واحلامنا كذبةٍ عشنا نرقّعها
ونضحك على بعضنا بأحلام مقتوله
بإيدين مشلوله بنبني مرابعها !
بالله .. من قد بنى بإيدين مشلوله ؟!!
والنيّه الطيّبه من طيب منبعها
وكلّن على قدر طيبه يسرج خيوله
مثل القصيده يدلّك طيب مطلعها
عنها وتبقى بكل لسان مقيوله
مانيب مخبول يعشق بنت ضيّعها
ولا سالفة عاقلٍ هايم بمخبوله
السالفه كان ودّك تعرف اسمعها
ياللي تلوم الرفيدي إسمع لقوله :
زرعت ورده وليتي قبل ما أزرعها
في روض مشتل نشدت الروض منهو له ؟
ويوم ازهرت شفت راعي الروض يقلعها !
قدّام عيني وانا بإيدين مغلوله
وقّفت مذهول وعيوني مدامعها
تشهق بدمع وقف بعيون مذهوله
صوّت .. ياعـمّ تكفى بس أطالعها
وأشحذ وجيه العرب واقول قولوله
عين ٍتجوع السهر من شان تشبعها
ياتنعمي ياتخلّي النفس معلوله
قالوا تبيها نصيحه بندقك بعها
ماهيب صوب الجفول ولاهي بحوله
وامسيت وانا اطفي الشمعه وأولعها
في حروة الفجر مير الليل ياطوله
إن لمت عين ٍبكتها الثانيه معها
وإن جيت ابنسى ولاهو شيّ ياهوله
من عقبها النفس طاري الورد يفجعها
وألعن ابو الورد كلّه واعشق ذبوله
وآخر سؤالن ٍحرم هالعين مضجعها
وأقفت تشوف الحقيقه شبـه مجهوله
ياخي .. اكفّر ذنوبي يمكن ابلعها
لكن اكفّر ذنوب الخلق ..معقوله ؟!!
| 
مافيك حيلة يابوحميد 
العرض العادي
