 قصيدة أتمنى أن تنال إعجابكم
عالقلب يورق من طواريك بستـان
وسيرتك مرت في شفاتي حكـاوي
ياللي ليا من مرك الشوق عجـلان
وقف على بابك دروب وخطـاوي
لميتي بجوفـي مواويـل والحـان
لاني نثرتك وسط صدري غنـاوي
قبلك حسبت الكون بالغيـد مليـان
وعقبك عرفت انه من الغيد خاوي
بعض المحبة لو تمنيـت إنسـان
ماجات بيديـن الرجـا والمنـاوي
ولاّ إذا جا الحب من دون عنـوان
بانت عليه من الهقـاوي هقـاوي
وانتي قلبتي بجيتـك كـل ميـزان
على قوانين الهـوى والهـواوي
جيتي مثل غيـم وتباشيـر هتـان
هادي الرعد لو كان برقه سنـاوي
من يوم ذقته قلت ابي زود عطشان
ولو كنت راوي قلت ماني بـراوي
جيتي وصارت للعصافير جنحـان
تسابق ريـاح الأمـل والرجـاوي
جيتي وصار الليل والصبح سيـان
وقتٍ على طول الفصول متسـاوي
لو ضعت في حبك فلاني بخسران
وان جات عالفرقا فلاني بناوي
والله لو لاموني الإنـس والجـان
على وصالك ما أجيهـم حيـاوي
التعديل الأخير تم بواسطة أحمد الرفيدي ; 21-06-2008 الساعة 04:56 AM.
| 
العرض العادي
