صعودلاينتهي

السلام عليكم ورحمة الله وبركاته
أسرد لكم مشكلة أسرية غرررريبة جدا

أنا عندي أخ أكبر مني بسنتين خريج جامعي ومقدم على بعثة لأمريكا ما تزوج >>> لا تقولون وش دخلنا فيه وبسيرته اصبروا عشان تفهمون القصة زين

مشكلة أخوي أنه انسان مــتــكــبــر وغامض ويهمه المظاهر وكلام الناس عنه وما يحب أحد يتدخل فيه ويحب أنه يكون الكل بالكل

أمي الله يحفظها مدلعته وتموت فيه وتفرقه كثير عن اخواني اللي أكبر منه واحد أكبر منه بسنة ونص والثاني بثلاث سنوات
اخواني متزوجين وعندهم عيال وشهادتهم ثانوي
اخوي هذا شايف نفسه عليهم ويحس أنه أحسن منهم عشان معه بكالوريوس
مرة أخوي الكبير قاله قدام أبو جيراننا قم صب القهوة قال لا قم صبها أنت
قال أنا أكبر منك قال الكبر مو بالعمر الكبر بالعقل أخوي تفشل وسكت
مرة ثانية يلعب مع اخواني بلوت وفازوا أظن عليه قام زعل وقال أنا أحسن منكم وانتم ثانوي وأنت وأنتم !!!
المهم أمي مررررة مدلعته وأبوي يموت فيه وخواتي دايما يوحون له ب انه هو الزين واللي ما مثله احد هو صحيح جميل بس المفروض ما يمدحونه هالمدح
تعود انه المدلل اللي ما مثله صار يغلط وما يرضى احد يغلط عليه
المهم مااظلمه هو بالغالب ما يحتك ب احد وما يطلب من احد شي خصوصا بالسنتين ا لأخيرة
قبل أربع سنوات كنا بنروح زواج وتأخرت أختي ما طلعت قام زعل وهاوشها وقعد عقبها أربع سنوات ما يكلمها حاولت تكلمه ما عطاها وجه وإلى الآن ما يحتك فيها بس أحسن من أول فيه كلام بسيط وسلام بينهم
قبل سنتين خطب أختي هذي رجال متزوج وزعلان من زوجته وأختي صغيرة ما بعد تزوجت وأمي قالت إلا تاخذه ما دام أنه ملتزم وأنه طالب علم
قال لالالالا قالت أمي تبون واحد مثلكم يأخر الصلوات ويشوف الدشوش
قام هو زعل وجلس حوالي سنة ما يكلم أمي ولا يسلم عليها ولا يجلس بالمكان اللي تجلس فيه وأمي ما غير تصيح وتون ويرتفع الضغط عندها وودها تروح تحب راسه عشان يرضى

تدخل خواتي حاولوا يصلحون ما فاد
خوفوه من الله قالوا له ما يجوز الواحد يزعل على أمه هذا عقوق ما فاد يالله يالله جت أمي قالت له وش فيك وش اللي مزعلك ويالله رضى على شوي شوي مب على طول



المهم مالكم بالطويلة رضى على أمي عشان تخطب له ودورنا له وخطبنا بنت ناس ملتزمة وجميلة وعيوا أهلها وانهبل يبيها
صار يقول دوروا وكل ما قلنا له قال لا مابي ذولا ولا ذولا مب من مستواي وهالعايلة ما تصلح لي وهالعايلة فيها
المهم شفنا بنت حلوة عجبتني أنا وأمي ورحنا وكلمناه قال لا هذي العايلة ما ابيها وأمي تمدحها وتقول كانك تطيعني خذها ويقول لا

سكتت أمي عنه وعقب جاء قال كلميهم كلمناهم وراح شافها قال ما ابيها وبعدين قال اصلا ما شفتها ابد لأني ما اقتنعت اخذ منهم

قلنا بكيفك
عقب فترة رجع قال ابيها وصار يحن على امي كلميهم

كلمتهم أمي قالت ما يخالف نرجع قالت امها ايه
ورجعنا وقال اني مستخير ومرتاح لها مرررة مررررة وابيها وقال لأمي كلميهم حددي موعد الشبكة واسأليهم وش يبون نوع شبكة

المهم كلمتهم أمي وقالت أمها خلي الشبكة والملكة بيوم واحد


عقب هون وصار يتهرب ويقول بعلمكم بعد يوم أبيها وإلا لا وأمي انهبلت وشلون تفشلني مع الناس قال عادي وعقب قال فشيلة

المهم أمي اضغطت عليه وكلم أبوها وحدد معه موعد عشان يروح هو وأبوي يتفقون رسمي

قبل الموعد بساعة ارسل لأبو البنت رسالة وقال انا مابي البنت وفشلان منك لكن ما ارتحت بعد الاستخارة

المشكلة ابو البنت دكتور وفاهم

ابو البنت ما قرا الرسالة قعد ينتظره هو واخوه وعياله ما جاء اخوي قام دق عليه قال وينكم ابطيتوا قال اخوي ما قريت الرسالة

يوم قراها سكر السماعة

عقب يومين اتصلت ام البنت تقول وش صاير ليش كذا ان ابونا انهبل يقول لعب بزران وش هالحركات وقعد يهوش علي ويقول لو يجي احد من طريقك ياويلك يعاني زوجته

المهم جت امي وقالت له وراك انت كذا فشلتنا مع الناس سكت وما رد على امي وعقب زعل على امي وصار ما يكلمها ولا ياكل بالبيت ولا يسلم على امي نفس حركاته يوم الزعل الأول


أمس أختي قالت له وراك تسوي كذا وامي مريضة ما فكرت تسلم عليها ووراك هونت عن الناس فشيلة حنا ضاقت صدورنا نحسب فيك شي قلنا يمكن المستشفى قايلين لك شي بخصوص الانجاب لأنه هو يقول مانيب متزوج مابي اظلم بنات الناس معي وهو قبل مسوي عملية دوالي المهم زعل على اختي وقال انتم تتكلمون من وراي وتتهموني وطلع زعلان
دقت عليه اختي قفل جواله
ارسلت له تتأسف مارد عليها مع انها كبيرة بالثلاثينات بس ما قدر


المهم جاء بالليل وحط ملابسه بشنطة وشال اغراضه وطلع بدون ما يكلم احد

دقت اختي عليه لقته جواله ملغية يقول الرقم خطأ

امي من امس تصيح وتدعي وضايقة صدورنا

أتمنى تدعون ربي يهديه وابي مشورتكم بهالمشكلة الله يوفقكم ويسعدكم

ابو محمد الدوسي

ليش كذا ان ابونا انهبل يقول لعب بزران وش هالحركات

والله انك سحبتي فينا انتي واخوك هذا لا وبعد قلتي مالكم في طول السالفة اما عليك ايجاز خطير
الحل في نظري الفلكة له ول امثاله ولو حصل لك سوطين انتي بعد ماهي بشينة عشان العنوان الي كاتبته والموضوع الخطير هذا كم عمرك انتي الله يهديك ترى امزح
تقبلي مروري ومداخلتي التي اتمنى تتقبليها بصدر رحب

صعودلاينتهي

لهالدرجه الموضوع سخيف ولايستاهل المشاركه
ماعندكم حل دعوه اشوفها على الشاشه
بصدق الاعضاء اللي في المنتديات الاسلاميه يطفشون ومايتفاعلون ولايشاركون الواحد بضيقته
لا وتريقه ويـبيـلي سوطين
هذا جزاتي اللي فتحت قلبي للمنتدى وتكلمت بشي مضايقني والاالواحديكون رسمي احسن
ياموضوع علمي بحت او فائده والامايشاركون الواحدبمواضيعه
المشكله اني كتبته على العام يعني مو الفضاء الشرعي او غيره
اذا المنتديات الاسلاميه مافيه تعاون وش المنتديات اللي يكون فيها تعاون
بالعكس احس الموضوع اللي كتبته مــــــــــــــــهـــــــــــــــــــــــــــــــم مــــــــــــره لانه فيه اصــــــــــــلاح
وانتم تتكلمون عن اصلاح الامه واللي مايقدريصلح الواحد ماراح يقدر يصلح العشره
وبعدين فيها تنفيس كربة مسلم
ومسلم مرررررررره متضايق ومتكدر
تكفوووووووووووووووون ابي حل للمشكله اللي كدرت خاطر بيتنا كله

خلجات

أختي صمود لا ينتهي ..
لا تضيقي صدرك ..
ألاعضاء يمكن ما انتبهوا لمشكلتك ..
لوإنتبهوا كان ردوا عليك لو بدعوة ..

أسال الله بمنه وكرمه أن يرد أخيك ردا جميلا ..
أسال الله له الهداية والصلاح ..
الله يصبر والدتك.. يارب ..
لاتنسي الدعاء له بظهر الغيب ..
على أمل ان يرجع لكم وهو على أحسن حال ..

__________________

	لا حول ولا قوة إلا بالله .. سبحان الله وبحمده سبحان الله العظيم ..

هنا أبوعاصم

إن العود إذا قومته من صغر لان معك واستقام

نسأل الله له الصلاح،

عليكم بمن يحبهم ويقدرهم ويعتبرهم قدوة له -إن وجدوا- من أجل التأثير عليه فهو يسمع منهم أكثر من أبيه وأمه وإخوانه لأنه يراهم أفضل من أهله

أعانكم الله.

__________________



ربي إجعلني مقيم الصلاة ومن ذريتي ربنا وتقبل دعاء

اللهم أعنا على الموت وسكرته
وعلى القبر وظلمته
وعلى اللحد وضمته
وعلى يوم القيامة وكربته
وعلى السراط وزلته

بلسم الحياة

اسأل الله ان يهدي اخيك ويرده لجادة الحق ...واعتقد لوكانت تربيته منذ الصغر تربيه صحيحه لاافراط ولاتفريط لما حصل ذلك ..ولكن عليكم بالدعاء والاستغفار لعل الله ان يعيده الى رشده

__________________
[/align]

صعودلاينتهي

ابشركم اخوي رجع وراضى امي وعطاها رضاوه
بس الله يهاديه الى الان في نفسه شي