طريقنا إلى مــــكة >>> فيها من المواقف المرعبة والمضحكة بنفس الوقت

العبقرية جودي · 13-02-2008, 12:07 AM

السلام عليكم ورحمة الله وبركاته

حياكم الله وبياكم في هذا الموضوع والذي سننطلق فيه لنتحدث عن المواقف المرعبة والمضحكة في الوقت ذاته والتي حدثت لنا حينما كنا متوجهين في طريقنا إلى مكة

القصة الله يطول بعمركم ..

في الساعة الحادية عشرة قبل الظهر .. ركبنا السيارة متوجهين إلى مكة المكرمة … مرينا أقرب بوفيه .. وأخذنا لنا فطوررر .. وتوكلنا على الله

أول ما مسكنا الخط … ولا السواق ( إلي هو أخوي ) يشوف أن البنزين باقي عليه النص .. حتى يفضى.. قال : ما عليه .. نوقف عند أقرب محطة ونعبي

لكن سبحان الله أول ما وقفنا عند المحطة .. لبقنا عن محل تسجيلات .. والتفت الحبيب علينا : أقـــول خواتي
حنا : لبيه
السواق : مـــعكم أشرطة نسمعها بالطريق
حنا : لا بالله ..
السواق : وش ودكم أشتري
قلت له : شـــوف ألبوم روائع القصص للسويدان معروض أشترهـ
نزل .. وشتراهــ بعدين رجع .. ولبقنا عن بقاله واشترينا إلي نبي ثم .. مسكنا الخط …. لاحضوا إننا جايين أساساً عشان نعبي ومن النباهة والفطنة فينا طلعنا ما عبينا
بعد ما مشينا بثلاث ساعات .. يعني الساعة 3.. وكنا وقتها معلين على صوت المسجل .. فجأة .. بدأت سرعة السيارة تقل بالتدريج حتى كادت تتوقف .. انتبه أخوي وشهق ذيك الشهقة .. اووووهـ ....ما فيه بنزين .. الله يهديكم ورا ما قلتوا لي .
. لف على يمين حتى وقفت السيارة .. على طرف الطريق .. بعد ما استوعب إلي يصير حوله .. التفت علينا : يالله يا صبايا وش الســــوات
حنا : ما يبي لها تفكير .. وقف أي أحد يساعدنا
نزل هو وأخي الصغير .. ووقفوا يأشرون .. والناس الله يهديهم ساحبين عليهم .. حتى في الأخير وقف لهم شاب راكب ددسن غمارتين
اشرحوا له الوضع وقالوا له : نيتك تساعدنا
قال : ما فيه مشكله .. بس معاكم اللي إلي نعبي فيه البنزين
خواني : لا والله
قال : أجل ما أقدر
قالوا له : طيب يا الطيب فيه أي محطة ورانا ولا قدامنا
قال وشكله مو فاظي لهم : لا والله بعيد .. وأنا بصراحة موب فاظي .. الموهم صرفهم
قالوا له : طيب عطنا رقم أمن الطرق
عطاهم اياهــ ورجع لنا أخوي : أبشروووا بالخير … بس شـــوفوا لحد يدري
دق عليهم وعطاهم وصف السيارة وقال لهم أنه محتاج بنزين وعطاهم موقعه … قالوا له : والله مو مشكلتنا .. أنت غلطان المفروض تكون حريص … لكنا احنا بنفزع لك
قال : ما عليه .. بس تعالوا
رجع وجلس .. وحنا تقولون في نزهة مو في ورطة .. إلي .. جالسة تكلم صديثتها .. وإلي جالسة تسمع في جوالها .. وإلي .. يقشم الفصفص .. وإلي جالس يغني

وماااخذين الأمور ببساطة على أساس أن أمن الطرق راح يجون ويساعدونا … لكن مرت نص ساعة ولا جو … ثم ساعة .. ثم ساعة ونص .. ثم ساعتين ..والتوتر بدا يسيطر على الجو .. والخوف بدا يعمل عمايله .والسماء بدت تظلم … بجد بيدنا نوسوس

من الساعة 3.30 إلى 5.30 شي مو معقول

في خلال هالساعتين إلي مرت .. بلغ منا الطفش مبلغـــه .. وبلغ منا الحــــر مبلغه
مسك أخوي الصغنون الجريدة وإلي معروف عنه أنه نصراوي متعصب .. قال لأاخته إلي اكبر منه بشويش : ماااافيه ولا لاعب سعودي شـــعره ناعم >>> بلاهــ من زود الفضاوة
قالت له : لااا يا غبي .. شوف هذا
قال: ايه صح حسين عبد الغني أنعمهم شعر

قلت له : أدع ربك أزين لك .. واستغفر .. وش بيطلعنا ألحين .. كل ما وقفنا أحد ما عطانا وجهــ

قال : هههههههههههه عادي امن الطرق بيقومون بالواجب

وأمن الطرق وما أدراك ما أمن الطرق .. مـــأ فيه أمل يجون.. كل ما دقينا عليهم .. يسؤلونا للمرة ألف .. وينكم .. ايش سيارتكم وش مشكلتكم .. خلاص أرسلنا لكم دورية ولا دوريتين .. حتى أذكر دقينا عليهم في المرة الثالثة : رد علينا جداوي وقال بصوت مروع : خلاص جتكم الدورية … وسكر السماعة

واحنا الغضب والحنق عليهم وصل إلى أقصى مداااااهــ … إذا موب جايين .. يقولون ماحناب جايين .. موب يلعبون علينا

الطاهر من يوم دروا أنها بنزين .. وهم غاسلين اديهم

لما بدا السأس يدب فينا .. قالت أختي : يالله أجل برووح أصلي لي ركعتين ..
وألسواق : من زود الطفش والقهر ما له إلا الجريدة .. أخذها وبدا يقرى بصوت عالي .. وإلي رافع ظغطه أكثر .. أننا ماسكين عليه تعليق وطناز .. أنت ما تعرف تسوق .. ولا عندك سالفة >>> نزود الطين بلهــ

وبجد بديت أخاف .. وبدت أستغفر أكيد هذا من ذنوبنا .. لكن خواني الله يصلحهم يخربون علي … ويخلوني أظحك عصب عني من حركاتهم البزرانية .. ولا أكنهم في مأزق .. يضحكون ويغنون … ويلعبون بعد .. التفت عليهم : خلاااص أنت وياها .. أعقلوو .. واذكروا ربكم
قال أخوي صغنون وهو يغني : يالله يا رب يجون أمن الطرق .. ويطلعونا .. ونروح نعتمر يا ربي .. أختي الصغيرة تقول وراهــ آمين .. يا ربي >>> يقال لكم أنهم يدعون ألحين

التفت على أخوي السواق قلت له : يا أخـــي .. والله موب حل صحيح هذا .. إلى متى واحنا ننتظر … وقف لك احد تصرف
قال : لاااا وعدنا الحكومة ما ينفع نسحب عليهم
قلت : اهااا بس .تكفى يا الخلووق.. وقف أي أحد بس
طلع من السيارة وظل يأشر .وقف له واحد .. ثم الثاني .. للأسف كلهم رافضين يساعدونا … حتى ربي رحمنا بالأخير .. ووقف لنا شااايب ( يا الله يا رب أنك توفقه وتفتح له أبــــواب الخـــير )
شرح له أخوي الوضع
ناظر الرجال يمين يسار .. وبدا يتفحص المكان والسيارة .. ثم قال : لا خير ان شاء الله \... فيه محطة ورانا على بعد كيلوين .. أركب معي أوديك
أخوي طااار من الفرحة : تســـــلم .. وأشر لنا من بعيد… أجلسو لين أجيكم
وركب معاهــ وخــــــــــــــــــــــــلانااااااااااا

تخيلوا .. ثلاث بنات لوحدنا ولا معنا إلا ولد صغير

أنا من النوع إلي ما أخاف … لكن في هذا الوضع طقتني أم الركب وقلبي صـــار يرقع .. سكرنا ابواب السيارة .. وجلسنا ننتظر مصيرنا المجهول
بعد عشر دقايق وكنها عشر ساعات .. رجع لنا أخــــوي والشايب معاه .. ومعـــهم جالون بنزين … ..عبوا السيارة بنزين … وراح الشايب لسيارته .. ولحقه أخوي وشكره وحب راسه .. ورجع لنا وهو مبسوط ..: شــــوفي أنتي وياها ..كـــل وحدة تخص لهالشايب شوط كامل .. تدعي له …. ما فزع لكم بعد الله إلا هووو
وحنااا بصوت وااااحد : طـــــيب
قال : وفيــــه شي ثاني
حنااا : وشـــــو
هو : أمـــــي لا تدري …. ويضيق صدرها بعدين
قال أخوي الصغير بنذاله : إلا أبعلمها … خلك مرة ثانية تعبي بنزين أول ما تمشي
قال وهو يحرك السيارة : ايه جرررب وشـــف وش بيجيك

وكملنا طرقنا بأمن وسلامة .. واعتمرنا ودعينا للشايب .. ودعيت لكم .. وخصيتكم .. وبعدها رجعنا لبيتنا ولله الحمد

لكن فيه بعض النقاط .. ودي أنكم تستفيدون منها … حتى لا تجربون إلي جربناهــ

أولاً : لا تمسكون خط إلا أونتم عاسين البنزين .. ومحرصين سواقكم أنه يعبي
ثانياً : لا تنسووون اللي حق البنزين .. عشان لا فظى البنزين عليكم .. يسعفكم اللي
رابعاً : إذا صار سواكم مفهي أو مسبه .. أو نساي ذكروهــ عشان ما تبلشون
عاشراً : إذا صار لكم الموقف هذا لا سمح الله : استغفوو واذكرو ربكم .. ولا تعصبون .. ولا تلعنون ولا تقولون لو أن كذا لكان كذا ..ا .. تتصرفو بهدوء وروية وعقل
مئة : لو سحبو عليكم أمن الطرق وما جوكم .. لا تجلسون مكتوفي الأيدي ... وقفوا على الطريق وأشروا ... لو ان شاء الله صرفكم عشرين ألف واحد .. لا تيأسون .. فلا يأس مع الحياة ولا حياة مع اليأس ... يمكن يوقف لكم شايب زينا ويساعدكم

وسبحانك اللهم وبحمدك أشهد أن لا إله إلا أنت أستغفرك وأتوب إليك

والسلام عليكم ورحمة الله وبركاته

ورود الصباح · 13-02-2008, 12:51 AM

موقف لا تحسدووون علية

صراحة لو أنا مكانكم ماراح أقعد في السيارة وحدي مع بنات
كان رحتي معهم هو والشايب قدامكم
وأنت وأخواتك والصغنطوط وراهم ((لصقــــــــــة..واثقه من نفسها

أتذكر زمااان رحنا لجدة وأيامها كنت صغيييرة ووقفنا عند المطعم
وأناكنت لابسة ذهب((أيام العز
وجانا شايب وقال: لاتخلون البنت لوحدها في السيارة
في حرامية يسروقون الذهب عاد هم يقصون الذهب وياخذونه
لا عاد أنا تخيلت يقصون يدي وقمت أبكي موراضية أقعد
لافي السيارة ولا أروح مع أبوية المطعم وأتخيل تخيلات
يعني إذا قعدت في السيارة يمكن يكسر القزاز وياخذني
(( (((مع إنهم أقترحوا علي أندس محل الأرجل أكرمكم الله
بس مارضيت أخر شي رحت مع أبوي وطول الوقت ماسكة
فيه (لصـــــــــــقة)..

بس على العموم دايم الشياب راعين خير ومعروف((لو ماإنه جاء وقال الخبر الحلو حقة

ملكـة التفـاؤل · 13-02-2008, 03:01 AM

يوووه يا جوووودي وش هالفلم ,,

بس تعرفين انا احب هذي المواقف وخاصتن التغريز ,, (( من جد تجلس السفرة بالذاكرة )) ..

واهم شئ ان الموقف صار بالنهار احمدوا الله ياقلبي ,,

والحمدلله على سلامتكم وعمرة مقبوله إن شاء الله ...

تحيتي لك ...

رؤى فهد · 13-02-2008, 05:23 AM

ياهلا والله بالعبقرية ومواقفهها .. لكن من جد موقف قوووووي بس الحمدلله ربي سترعليكم وسهل
طريقكم ... والعمرة مقبولة إن شاءلله .

** هـــديـــل ** · 13-02-2008, 06:37 AM

اعوووذ بالله وش الموقف والله يضيق الصدر يا عمري علييكم ..

والله خطر علييييكم ’’ انتبهوا مرره ثانيـــه سبحان الله كل هل ساعات
عن جد صار لك خلق للعمرة بعد ماصلتوا الحمدلله ع سلااتكم ولا عاد تعيدونها ,

وعندي ملاحظة ونصحيه << 3 بنات وولد صغير خطر عليكم تجلسون بالحالكم

في طــــريق ســـريع بسم الله عليكم هل مرة سلمتوا لكن المرة ثانيه خوذوا حذركم .
تصدقين لو انا منــك كان ما اطلقت خوي ابد يعني ما عتقدته < اروح معه واركب مع الشايب
بس ما اقعد لحالي ..

اقوول سلامتكم ’’ والف سلااااامه عليييك ..

قصه حلوه < بس فيهااا رعب ,,

العبقرية جودي · 13-02-2008, 12:30 PM

اقتباس:

المشاركة الأصلية كتبت بواسطة ورود الصباح

موقف لا تحسدووون علية

صراحة لو أنا مكانكم ماراح أقعد في السيارة وحدي مع بنات
كان رحتي معهم هو والشايب قدامكم
وأنت وأخواتك والصغنطوط وراهم ((لصقــــــــــة..واثقه من نفسها

من كبر سيارته عشان .. نركب معاهــ .. ددسن أبو غمارتين .. إلا إن كان نركب بالصندوق ممكن

أتذكر زمااان رحنا لجدة وأيامها كنت صغيييرة ووقفنا عند المطعم
وأناكنت لابسة ذهب((أيام العز
وجانا شايب وقال: لاتخلون البنت لوحدها في السيارة
في حرامية يسروقون الذهب عاد هم يقصون الذهب وياخذونه
لا عاد أنا تخيلت يقصون يدي وقمت أبكي موراضية أقعد
لافي السيارة ولا أروح مع أبوية المطعم وأتخيل تخيلات
يعني إذا قعدت في السيارة يمكن يكسر القزاز وياخذني
(( (((مع إنهم أقترحوا علي أندس محل الأرجل أكرمكم الله
بس مارضيت أخر شي رحت مع أبوي وطول الوقت ماسكة
فيه (لصـــــــــــقة)..

هههههههههههههه أشوى بعد ابوك معاك .. موب حنا إلي ما معنا إلا بزر

بس على العموم دايم الشياب راعين خير ومعروف((لو ماإنه جاء وقال الخبر الحلو حقة

على قـــولتك

يسلمووو يا عمري ع الرد الجميل

العبقرية جودي · 13-02-2008, 12:37 PM

اقتباس:

المشاركة الأصلية كتبت بواسطة ملكـة التفـاؤل

يوووه يا جوووودي وش هالفلم ,,

شفتي عاااااد

بس تعرفين انا احب هذي المواقف وخاصتن التغريز ,, (( من جد تجلس السفرة بالذاكرة )) ..

ليتك كنتي معانا ... عشان تحسين صح بالي حسينا فيه

واهم شئ ان الموقف صار بالنهار احمدوا الله ياقلبي ,,

والحمدلله على سلامتكم وعمرة مقبوله إن شاء الله ...

تحيتي لك ...

الله يسلمك .. والله يقبل منا ومنك .. وياهلا ويا مرحبا

العبقرية جودي · 13-02-2008, 12:43 PM

اقتباس:

المشاركة الأصلية كتبت بواسطة رؤى فهد

ياهلا والله بالعبقرية ومواقفهها .

يا هلا فيك يا الغلااا

. لكن من جد موقف قوووووي بس الحمدلله ربي سترعليكم وسهل
طريقكم ... والعمرة مقبولة إن شاءلله .

الله يقبل منااا ومنك .. يسلمووو ع الرد

العبقرية جودي · 13-02-2008, 12:49 PM

اقتباس:

المشاركة الأصلية كتبت بواسطة ** هـــديـــل **

اعوووذ بالله وش الموقف والله يضيق الصدر يا عمري علييكم ..

هههه الله المستعان

والله خطر علييييكم ’’ انتبهوا مرره ثانيـــه سبحان الله كل هل ساعات

ان شاء الله

عن جد صار لك خلق للعمرة بعد ماصلتوا الحمدلله ع سلااتكم ولا عاد تعيدونها ,

ايه أكيد لنا نفس .. من زود الفرحة .. الله يسلمك

وعندي ملاحظة ونصحيه << 3 بنات وولد صغير خطر عليكم تجلسون بالحالكم

في طــــريق ســـريع بسم الله عليكم هل مرة سلمتوا لكن المرة ثانيه خوذوا حذركم .

الشكوى لله وش تبينا نسوي

تصدقين لو انا منــك كان ما اطلقت خوي ابد يعني ما عتقدته < اروح معه واركب مع الشايب
بس ما اقعد لحالي ..

هههههههههه من كبر سيارته عشان أركب معه

اقوول سلامتكم ’’ والف سلااااامه عليييك .

الله يسلمك يا عمري ... .

قصه حلوه < بس فيهااا رعب ,,

كذااا الدنيــــــا ..... أسعدني مرورك الخفيف اللطيف

غدي الامل · 13-02-2008, 05:27 PM

ههههههههههههه
والله موت من الضحك لما نسيتوا اتعبوا بنزين بس شكل السواق اول مرة يسافر فيكم
زعلانه منك ياجود له ماكلمتيني وانا قريبه كنت ساعدتك
الحمد لله جاءت سليمه هذي المرة بس احرصي ثاني مرة ما يتركم السواق لوحدكم مع اخوكم الصغير لركبتكم كلكم مع الشايب
ان شاء الله من المقبولين للعمرة
شكرا على الموضوع الجميييييييييييييييل