مسألة خااااصه بحواء ممنوع دخول أدم هنا@@ العنز نفاس@@ (أزمة على طاولة النقاش ).

جهوده · 12-12-2007, 05:06 AM

ـــــــــــــــــــــــــــــــــــ
معلومات لابد من معرفتها قبل تقرون الموضوع..
النفاس :هي الفتره اللي مابعد الولاده وهي اربعين يوم..
الحلبه : بلوى تاكلها المرأة الوالده وعليها ريحه اللهم ياكافي تقول نووي..
.......................................
عزيزتي حواء .. قبل أن ابدأ بحكايتي هذه أريدك أن تُجيبي على هذه الأسئلة فإن كانت أجوبتك بنعم يمكنك الاسترسال في القراءة وإن كانت بلا.... فاقلبي وجهك ..
والله يعين (هنوده) على اللهجة

..
............................
1- هل أنت عزوبية تعيشين في وسط عائلتك ؟
2- هل أنت موظفة أو طالبة ؟
3-هل لديك أخوات متزوجات ؟
4- هل أخواتك مكاين تفريخ ؟
5- هل حصل في يوم من الأيام وعدت من الدوام تعبانه وتافلـة العافيه وراسك يرقل من قلّ بركه لـ تتفاجئي بأصوات ضجيج صادره من بيتكم تصل إلى مسامعك قبل أن توطوطين عتبة الباب ؟
6- هل حصل ودرعمتي لبيتكم لـ تستقبلك رائحة الحلبة المنتشرة في كل دعاسيق البيت في الداخل ؟
7 -هل استيقظت مذعورة من نومك الهادئ ذات ليلة على زعاق بزر توهـ لحمة حمرا ما بعد تعلم وشلون يصيح باحترام ؟
8 - هل زد رأيت تجمهراً أمام باب حمام بيتكم - الله يعزكم - ويوم قربتي شوي كودك تشوفي وش السالفة وبالطق والطقاق دخلتي راستس من بين حشود المتجمهرين وإلا هي أمك وأختك ماسكين نفس قطعة اللحمة الأنفة الذكر وجالسين يسبحونها ؟
9- هل سبق أن عدتي من الدوام لتجدين بيتكم مزدحم بالزوار ومن ألمحت أمتس طرف خشتك مدت لك الدله بدون تفاهم وقالت قهوي العالم ؟
******************************
إن كانت أغلب أجوبتك عزيزتـي بـنعم .. فـمبــــــــروووووووووك

في بيتكم نفااااااااااااااس :
اللهم لا اعتراض ....

بس والله للصبر قالوا حدود يا مصبر الموعود
كل يوم أقول بيجي رجلها ويقشعها هي وذرّها من عندنا بس ماش ماحولك أحد .. الله العالم الولد بيصير عمره سنه وهي توها نفاس ما قضت !
يا جماعة الخير.... لا تفهموني غلط .. أنا أحب أختي واقدّرها والود ودي ما تفارقني .. بس أحبها لحالها بدون الفوائد اللي طلعت فيها من زواجها... ذولا القرود الي معها منيب اواطنهم !عيال أختي إيه ما قلنا شي ! بس فيهم بثارة تيزي"تكفي" بلد .. !
لا وإذا تحملناهم وقلنا ماعليش توهم صغار والحشمة لأمهم مهيب لهم ..
ونبلع هالغثا اللي يصير على شرف ذا النتفه الجديدة اللي جدعتها .. تحسبونه يثمر وإلا يبين فيهم ؟ من يصير طول هالنتفه شبرين اول كلمه ينطقها ويقولها لك "...؟؟؟!!!!؟؟؟.. " !وإلا ليش الفضايح
خلوّا ذا على جنب مهب موضوعنا ..
اللي قاهرني صدز هالـ (40) يوم اللي اشوفهم ..
سبحان الله عمر الحريم ما احترموا مواعيد ولا وقت إلا بـذي ! يتحروون الدقة بالحسبة .. (40) يوم بالضبط مستحيل تنقص بس ممكن تزيد
(40) يوم وحنا ما عندنا غير فاتحين باب و راديّن باب.. مستقبلين زوار ومودعين زوار .. مدخلين فلانة وبناتها ومطلعين فلانة وحريم عيالها ..
لا وكله كوم وإذا جت وحده الله يجزاها خير بزعمها راعية واجب وتكت من عقب المغرب إلى 9 عندكم وانتي يا حيل الله مالك إلا تدورين بهالقهوه والشاي .. وإذا خلااااص تكرمت و ألبست عباتها وأطلعت .. ترجع بسرعه وترفع نقابها وتزف لتس الخبر الحلو " ماعليش ترا بناتي ماقدروا يجون اليوم بلاهم منشغلين شوي بس باتسر بحيل الله بيجون كلهم "
ماودكم تشوفون تعابير خشتي ساعتها..
مير الله يجزاك خير راعية واجب ! !!
الحين بناتك عندهم التزامات ومشاغل وبيسوون الواجب حسب فضوتهم .. ! بس أصحاب البيت عطّاليه ما وراهم شغل والتزامات ابد .. على حسابكم هم ؟
الله يقطع أبليسكم ترا فينا الطالب وفينا الموظف ما يرجع إلا على حروة المغرب وفينا المتزوج وعنده بيت يراعيه" .. ! !!
والأم مهيب بكل الأحوال بصحتها وفيها حيل تهابد وتراكض لكم انتم وزياراتكم !
ياخي خلوا جيتكم وحده وموعدها واحد .. مهب كل القبيله تجي تزور وكل يوم وحده داخله لحالها .. الله مير يهديكم عبالكم ماورانا الا انتم ؟<<<حولكم شي تخافون عليه ابعدوه عني تراي ششت وجتني ام العبيد..
ماخليت شي عن امي .. يمه حددي يومين بالأسبوع يجون العالم فيه !
يمه مالها سنع تاركين الدعوه سايبه تقل والله اللي عندنا عنز والده في حوش مفتوح وكل شوي جاي شايب والا بزر يويق عليها !
يمه ارحميني ارجع من الدوام ما أشوف مالي خلق أغير ملابسي وش عاد أقابل هالأمم !
بس ابــــد ! كان ذا الجدارن اللي وراكم نطق فـهي ترد علي ..
أما أول كانت تقول " يا كبرها عند ربي ! تبيني أقول للعالم لا تجونا .. انهبلتي انتي "
ياربي هو انا الحين قلت قولي لهم لا تجون ؟ قلت حددي لهم يومين وفكينا من هالقلق !
" لا يا خزياه .. قولة لا تجون إلا هاليومين زي قولة لا تجون ابد .. افرضي هاليومين ما ناسبوا العالم ! "
اجل مناسبنا حنا الأسبوع كامل يمه!!؟!
وأنا ما اعرف من الأسبوع إلا الجمعة ولا هوب يصفى لي بعد ؟!
هالكلام أول ..
الحين أبشركم أمي مهيب ترد علي خير شر ..

*********************
مقتطفات من أحاديث تدور في مجلس النفاس
:
:
:
*الحرمه.." عسى ما تعبتي بس يا فلانه ؟ "
أختي.." لا الحمد لله تيسرت "
الحرمه .." الحمد لله .. بس لا تعلمين احد إن سألتس.. بسم الله عليك ! ترا عيون الناس مهيب ترحم وأنا خالتس ! "
.............
تعقيب / اول شي يـ الخالة الملقوفة ترا هالسؤال مهب كلـن يسأله يوم انك توصينها ع الإجابه ! يعني ولادة وش ظنك ؟ أكيد بتتعب بوقتها وعقب خلاص .. المشكله ما يسأل الا ناس مجربينها .. اقول بس وش ذي التناحه يا شيخ !
:
:
:
الخاله: " شوفي يا فلانه .. لا رجعت البيت برسل لتس كيس فيه أعشاب استخدميها وإن شاء الله ماتطلعين من الاربعين الا وانتي بنت ما كنتس لا حملتي ولا ولدتي "
اختي المخفه: " صدق .. خلاص انتظرها اجل "
الخاله:" ايه بس يومياً مهب تهملينها .. وتشوفين لو انك أم لـ درزن عيال مهيب عايقه مع هالاعشاب "
..............
تعقيب / سؤال بريء - دام هذي نتايج اعشابك يا لخاله.. ورا زوجتس اخذ عليك عقب ثالث بزر جبتيه وحدهـ ثانيه ؟!!؟؟ :
:
:
الحرمه " ما شاء الله وش سميتّوا الصغيره ؟ "
أختي " دانه "
الحرمه اللي تسأل وخشتها مايله والحتسي ما عجبها " اييه .. مدري تسن الأسم مهنا زود ! يا بنيتي مدري وش ذا الاسماء الجديده الي طايحين بها العالم ! "
...........
تعقيب / ترا اصغر بنات الحرمه اللي سألت .. اسمها غزل !!
:
:
:
طيب الحين فيه سؤال يراودني عن نفسي ومضطرة اسدحه بس رجاءاً صيروا متحضرين شوي وفهموه ..
الحين الوحدة إذا ولدت وش تجيب ؟؟؟
لا أشوف احد مستظرف وقايل تجيب آدمي ! ادري اننا محنا بنجيب قطاوه ..
بس قصدي هالآدمي اللي هي تجيبه من هو حقه ؟؟؟
حق أبوه صح وإلا لا ؟
طااااااايب .. اسم الولد يلحق لمين ؟؟؟؟
يلحق لاسم أبوه صح وإلا لا؟
طاااااايب .. دام الدعوه كذا .. ودام النفاس أصلا بسبب هالولد .. ممكن احد يفهمني وش دخل مندوب اهل البنت يبحرون بها ؟ ورا مهب اهل رجلها هم اللي يصالونها ؟!(أي يراعونها )
ياخي الولد ولدكم حنا وش دخلنا ؟
والله ما خرب بناتنا الا امهاتنا الله مير يصلحهن ويخليهن لنا !
تجي الام مطفيه النور وطايره مليون بالحماس من تدري أن بنتها حامل .... ماتخلي عطّار ما تزوره ما تخلي شنق وداعوس ما تدعسق به .. ..كل شي ينشرب وإلا يوكل وإلا يلهم إلا وتجيبه .. وتفضي للبنت غرفه وتبلشنا نزلوا سرير ورقوا طاوله وجيبوا مفرش تقل أول مره يولد عندها احد ؟ وإذا هي أول مره وشو له هالحماااااس .. تراه نتفة بزر ونتق من بطنها مهب اختراع الله يصلحكم ..
هذا انتم قبلنا حملتم وجبتونا وش حيثكم ما سووا فيكم اهلكم كذا ولا ضركم ؟
بالعكس الوحده من اول لا اله الا الله صحتها فُل وهي والده في البيت .. ما ولدت بالمستشفى وخذت لها سويت كامل اسبوع وماغير تبطح وبلع بهالحلى والقهوه حتى ولدها مهيب ترضعه ..
ومن عجائب قدرة الله في خلقه إن المره ما تحلى بعين رجلها إلا إذا صارت في بيت اهلها
يالهيس وهي عندك في بيتك ما انتب تناظر خشتها .. ويوم صارت نفاس عندنا .. 24 ساعه ناشب لنا ! ما عندنا شغله غيرك انت وحرمتك وعيالك !
ياخي تحبهم وفاقدهم ضفهم ورح بيتك الله لايهينك .. وابشر بلي يجي يشقر عليكم كل يوم .. بس اعتقونا لوجه الله..
ولا يرفع ضغطي إلا لا صار جالس مع حرمته يسولفون في غرفتها وأنا بالصاله اللي جنبهم اهجّد فروخهم .. يقوم واحد منهم يدخل على أبوه وأمه ويزعجهم .. ويجي أبوه الله يطول في عمره يكرشه بكل حنان ويقول له " رح رح يا بابا لخاله سوير شفها تناديك "
اول شي يا سبع البرومبا تراك ماكل في عيالك مقلب كبر راسك ! اجل تبيهم ينادوني خاله ؟ عساهم ينادوني بإسمي مهب بشيـن ثاني ويسد !
ثاني شي وش قالوا لك أنا ؟ خماّمة الضايع ؟! نفسيتي تعورني ..
كل ما ذكرت ياخي هالأجانب طقتني غلقه وش زودهم عنا يا جماعة الخير يوم ان الوحده فيهم تولد من هنا وتصك الضيق من هنا .. ما توفي لها يومين الا وهي تقامز وتسوي رياضه
ورا هالفقمات اللي عندنا مهب كذا
وراهم 40 يوم ما عندهم غير فرم بهالمرقوق والجريش ! قال ايش .. ترمّ جسمها قال ، مهب ترميم ذا ردم الله يحييكم !
الوحده منهن ما تطلع لبيت رجلها عقب الاربعين الا على شيول..
لا والكمخه اختي اوريها ذاك اليوم صورة مره اجنبيه بالجريده يقولون انها توها والد..
شوفي ترا ذي الصور عقب ولادتها باسبوعين – وأأشرلها على الصوره
قالت .. وإذا ؟ ...لا تقارنينا يا حبيبتي بهم هذولا عيالهم عيال حرام !
ليه ياربي نفاس عيال الحرام يختلف عن انفاس عيال الحلال ..
اسعفوني .. أريد حلاً ؟

يععع احس ريحة الموضوع صارت كلها حلبه
:
:
:
" للمعلوميه ترى اختي والدة من سنه حشمناها نظرا لانها جايبتن لنا بنووتة مثل القمر لكن نظراً للظروف لم يتم تنزيل الموضوع الا الحين..لأن العقده اللي جتني توني اتخلص منها..
والله اني الآن مشتاااااااااقه للصغنووووووووطه فديتها
............
بصراحه ودي اشوف وجهه (هند جابر) الآن

هاااه هند بشري فهمتي شي

...

وانتن حبيبات قلبي وش رايكن في موضوع النفاس وعدم احترام الحريم لمواعيده والبهدله اللى تصير فيه
اكيد انكن تبهدلتن مثلي وازود

انتظر حكاويكن في هذا الموضوع

.......

** هـــديـــل ** · 12-12-2007, 06:03 AM

خخخخخخخخخخخخخخخخخخخخخخخ بصراحة والله اني استمتعت في قراءة الموضوع

المفروض تسمين الموضوع (معانات جهودة عن حالات النفاس ) خخخخخخ

والله ما خليتي شي وقلتيــه <خخخخخخخخ عن جد مدري وش اقتبس < اضحك ولا اعلق ولا وش اقوول << لي اشوي احدث الصفحة انتظر موضوعتس متى ينزل <<

اقتباس:

بس فيهم بثارة تيزي"تكفي" بلد .. !

<< كل البزران الله يسلمتس يا الغالية

<< انا اذا رحت عند خالاتي << تجيني الدووووووووووووووخه خخخخ

........................

اقتباس:

من يصير طول هالنتفه شبرين اول كلمه ينطقها ويقولها لك "...؟؟؟!!!!؟؟؟.. " !وإلا ليش الفضايح
خلوّا ذا على جنب مهب موضوعنا ..

حلوه شبرين <<< اعتقد اقــل بــعد <<< الله يعيينا عليهم ويصلحهم يارب هع هع ..

اقتباس:

لا وكله كوم وإذا جت وحده الله يجزاها خير بزعمها راعية واجب وتكت من عقب المغرب إلى 9 عندكم وانتي يا حيل الله مالك إلا تدورين بهالقهوه والشاي .. وإذا خلااااص تكرمت و ألبست عباتها وأطلعت .. ترجع بسرعه وترفع نقابها وتزف لتس الخبر الحلو " ماعليش ترا بناتي ماقدروا يجون اليوم بلاهم منشغلين شوي بس باتسر بحيل الله بيجون كلهم "
ماودكم تشوفون تعابير خشتي ساعتها..

<<< هذا الحال والله المستعان << وانااختس مالنا الا الصبر والاحتساب ولنا الاجر خخخ.
بس من جد تجي هي وبناتها مرة وحدة عشااان تخف الكمية علينا يعني بدل ما تجي 7 حريم في الاسبوع طبعاً الاسبوع 7 ايام يجي 4 ع الاقل << في الاسبوع

اقتباس:

الحين أبشركم أمي مهيب ترد علي خير شر ..

الشكولله سوسو<<< الام ما تستطيع هل شي تقوله << وياعمري عليها وش تسوي ما في اليد شي تقدر تسويه << هي مجبوره وانتِ لازم تصفين معها < جعل ربي يطول في عمرها ويخليها لكم ..

اقتباس:

تعقيب / ترا اصغر بنات الحرمه اللي سألت .. اسمها غزل !!

من جد مشكلها ’,

..طيب ليش تنقد ع اسم دنو <<

اقتباس:

وتفضي للبنت غرفه وتبلشنا نزلوا سرير ورقوا طاوله وجيبوا مفرش تقل أول مره يولد عندها احد ؟

يا حلوووو فرحتها بحفيدها الجديد ..

هــذا ما يدووور في البيوت اثنـــــــــــــــاء قدوووووووووووووووووووم طفل جديد لهم

نتجهز هل تجهيزات << عشان صغنبوط بيطلع لدنيا << وه فديته . يالله يحقله .. < هذا اللي نستطيع عليه .

اقتباس:

ولا يرفع ضغطي إلا لا صار جالس مع حرمته يسولفون في غرفتها وأنا بالصاله اللي جنبهم اهجّد فروخهم .. يقوم واحد منهم يدخل على أبوه وأمه ويزعجهم .. ويجي أبوه الله يطول في عمره يكرشه بكل حنان ويقول له " رح رح يا بابا لخاله سوير شفها تناديك "
اول شي يا سبع البرومبا تراك ماكل في عيالك مقلب كبر راسك ! اجل تبيهم ينادوني خاله ؟ عساهم ينادوني بإسمي مهب بشيـن ثاني ويسد !
ثاني شي وش قالوا لك أنا ؟ خماّمة الضايع ؟! نفسيتي تعورني ..

رهيبة فرووخه << يالله عاد انتي سكتي وهاوشي << وهم مهب فالحين إلا بالغثاء ورفة الضغط
حتى الله يصلحهم يا اليتهم يسمعون الكلااام ويهجدون ع طووول .. لاا احس اني اذا قلت لهم اهجدوا زادوا ..

اقتباس:

بصراحه ودي اشوف وجهه (هند جابر) الآن

هاااه هند بشري فهمتي شي ...

علاااااااااااامة تعجباااات << وش رايك اكلفتس << تكتبين هرجتس بالفصحى عشان على الاقل تستوعب هنو وش نقول .. شكلك بتكفخينن عقب هل موضوع وعقب التكلفة خخخ

..

وانا بصراحة ما عمري حضرت <<< نفاس الا مرة عند خالاتي ..
بس احس اني استمتعت ذيك الايام << بس تراها ما ابطت بالاجازه مهب مثلتس العام خخخ

بس يا حبيله اذا صاااح باليـــل << واذا جهزنا الفطور لخالتي المنفسه . احسها اجواء حلوه
بس يمكن تقولين لاني اول مرة احضر نفاس ...

ولا اذا كان بيجي احد <<< نختب ونتجهز واحس البزر اكثر شي يتبهذل يا ويلي
من الازعاج < وانتقاله من يد الا يد < ومن عدم رااحته في النوم الكافي لانه مسكين
ما يمديه يغطس الا هو مقوووم جاي ضيف جديد وطلب يشوووفه

هبوب القادسيه · 12-12-2007, 07:38 AM

خخخخخ..أضحك الله سنك جهوده...خخخخخ
موضوعتس .. وأسلوبتس زي العسل يااااعسل...الله يعينتس معاناه...
لي عوده بإذن الله لتعليق..بالتوفيق.

غادة أحمد · 12-12-2007, 08:17 AM

طبعاً الموضوع يحتاج إلى ترجمة إما إلى الفصحى أو العامية المصرية .

يعني فهمت سطر و عشرة لأ ، لكن ما فهمته أضحكني كثيراً .
و أنتِ محقة بالفعل في رائحة الحلبة

، لكن لا بد منها لفوائدها الكبيرة للأم و و المولود على حدِ سواء

المهم أنتِ تكتبين بطريقة تشبه طريقة أبو طوارئ و قد تمكن من كتابة سيناريوهات لقناة المجد .
شوفي لو يمكنك التعاون معه أو كيف توصلين هذه الأفكار و بخاصة أن فيها نقد لوضع اجتماعي و بطريقة ساخرة و جذابة .

بارك الله فيكِ و إلى الأمام ، و عقبال زواجك و دستة أولاد ،

دستة هذه بالمصري مثل درزن عندكم
بوركتِ

دموع الأفراح · 12-12-2007, 09:52 AM

بسم الله الرحمن الرحيم

أضحك البارئ سنيناتك:d

والله إنك محقه ياعزيزتي وأنا أتجول وأسافر بين حروفك

وأهبط بين كلماتك أحزن لحالتك تارة وتارة أصيب بالضحك

الجنوني..

أسعدك المولى...

محتاره2 · 12-12-2007, 07:59 PM

أقول جهوده أنت يبيلك ( مطرقة على راسك )

ما شاء الله متى ولدت أختك ؟؟

قلتي وش سمت بنتها ؟؟

ومن متى الحرفنه في الكلمات

( تيزي ) يعني كيفي .. >> هذي بأي قاموس .

/

/

أفرحك الله , بعض عباراتك أصابنا بنوبة ضحك

/

/

عاد ان شاء تعرسين ونشوف نفاسك مع الحلبة

/

/

الى الأمام قدما

/

/

محتاره

..

أجناديـن · 12-12-2007, 08:52 PM

هههههههههههههههههههههههههههههههههههههههههههههههههه ههههههه
هههههههههههههههههههههههههههههههههههههههههههههههههه ههههههه
هههههههههههههههههههههههههههههههههههههههههههههههههه ههههههه
هههههههههههههههههههههههههههههههههههههههههههههههههه ههههههه
هههههههههههههههههههههههههههههههههههههههههههههههههه ههههههه

والله اني حبيتك زود يا سارة أثرك خفيفة دم وحنا ما ندري ، ضحكتيني خصوصاً يوم يروشونه
هههههههههههههههههههههههههههههههههههههه

الله يسعدك يارب

أجناديـن · 12-12-2007, 08:59 PM

ترجمة خاصة للأستاذة غادة والباقي في أيام قادمة

النص المترجم :

4-
هل أخواتك عاملين زي المكنه من كتر ما يولدوا ؟!

5-
هل مرة رجعتي من الوضيفه تعبانه أوي و نفسك في راس خوشمك وراسك عمال زي الهزاز ، وفقأه إزعاجات واصله ودانك قبل ما تعتبي درجة البيت ؟

6-
هل حصل و مشيتي لبيتكم ( ما تشوفين الدرب ماله مرادف في اللهجة المصرية

) ويا حبة عيني مش شايفه حاقه من الهم والغم اللي كنتِ فيه في الوضيفه ، وزيادة النحس يستئبلك ريحة الحلبة اللي تطير نفوخك في كل زوايا البيت وسراديبه وحواريه ؟

7 -
هل استيقظتِ مذعورة من نومك الهادئ ذات ليلة على صراخ طفل صغنن زي اللحمة المسلوخة من لونه الأحمر ، مش عارف الزاي يعيط باحترام ؟؟؟

حقوق الترجمة محفوظ لي ، ولا نسمح بنسخها أو اقتباسها أو نشرها بغير إذن خطي من المؤلفة والمترجمة وإلا سيتم التعرض للمساءلة القانونية

الواثبة · 13-12-2007, 03:42 AM

أضحك الله سنك ياساره
والله صدقتي في كل كلمة
ولا نقول إلا صبراً جميلاً
ودمتي بخير

قارئة المستقبل · 13-12-2007, 03:43 AM

اما موضوعتس بصراحه فلــــــــــــته
شي فضيع الله يوسع صدرك بالعافيــه
عندك أسلوب جميل بصياغة النكته

وفكرة ذرة ضوء قمييييييييييييله قدا قدا