مساكم الله بالخير

أبي أقول لكم عن قصه صارت لي وأبيكم تشاركوني كل الأحاسيس البعيريه هع هع


المهم وأنا في عز النوم والسعابيل إلا فجـأه.. رن التلفون.. وطبعا تلفوننا شايل أبوي منه كل الأرقام.. موب مخلي إلا رقمين التسعه والثمانيه.. يعني مالك إلا تدق على الشرطة ولا الدفاع المدنـي وغيره مافيه..

المهم رفعت السماعه وأقول نعم.. إلا وذاك الصوووت اللي يرد الروح.. صوت بنت.. وأخوكم إذا سمع صوت بنت أوجعه بطنــه وأنواع الإسهال..
قالت: ألووو ((أنا ما عاد عرفت وش أقول انشلت براطمي وطلعت كني ياسر عرفات))
أل أل أل أل لووو..
قالت: مين معاي..؟؟
قلت: معاك أنا (( صراحه جواب يدل على ذكائك))
ضحكت البنت وأنا قلبي أحسه مووب طبيعي قـالبها سامري واستنزل عندي الكبد والبنكرياس.. أنواع الربكه..
قالت: سوسو موجوده؟
قلت: ما ينفع حـوحـو؟
قالت: مين حـوحـو؟
قلت: هذا اسـم الدلـع حـق ال**** اللي هـو أنا.. ضحكت للمره الثانيه على التوالي.. وقالت: يؤ.. يؤ.. شكلي غلطانه.. طيب آسفــه ..
قلت لها: لا عادي.. لا شكـر على واجب ((دايم أسمع هالكلمه وجالس أحتري الفرصه إني أقولها)) وقفلت السماعه..

تصدقون.. ما أدري وش صار فيني.. حسيت بشعقريــره في جسمــي وإن إفرازات الخشـم عندي زادت.. وودي أروح انبطــح في الحوش وأكتب قصيـدة هجائية.. لا يكون هـذا هــو الحـب اللي يقولون (( الله عالحب اللي تعرفه يالضفــدع لأن ما شاء الله بيتنا فيـه خـمـسـطـعـشـر رجال اللي هم أنا وأخواني وأبوي وأمــي الله يخلف على أبوك وأميمتك هذا وأنت أكبر أخوانك عليه العوض ومنه العوض))

المهم أنا وأخواني ما شفنا بنت أبــد.. وهذا سبب لنا عقــده تسمــى العقـده الفيسلوجيـه ((من وين جت ذي))

المهــم.. إنـي قررت إنــي أتعرف على بنات.. بس فيــه مشكلــه وحـــده اللي هـي أنا ما عنــدي أسلوب أبــدددد ((يعنـي وقفـت على الأسلوب.. أنت عندك ألف مشكلـه مو مشكله بس.. وأهمها مشكلــة وجهـــك اللي كنـه لوحة انتبه أمامك نقـطة تفتيـش))

الوكاد إني ما لقيت قدامي إلا واحد مـن العيال اسمه عبدوووش.. معروف إن البنات ما يعوقون معـاه.. وأنا اللي اللقـط مفتاح سيارتي وأروح لــه.. علمتــه بوضعـي وإن أمنيتــي في الحياة أتعرف على بنـت قبل ما أموت ((اخس يالشايب))

فقال لي: السالفه بسيطــه.. إذا بغيـت البنـت تحبــك حسـسـها إنها أحسـن وحــده فـي العالم..
قلت لـه: يعنـي كيــف.. يعنـي أقولها أنتـي أحســن مـن مارادونا؟؟؟
رفسنـي برجلــه فـي بطنــي..
وقال: أنت ثور.. وش دخل مارادونا يالغبـي؟؟ أنا قــصدي إنـك تحسسها بأنوثتها وإن ما فيه بنت غيرها في العالم..
قلـت لـه: برضه ما فهمـت.. يعني تبينـي أذبـح كل البنات وأخليها لحالها؟؟
وهــو اللي يموه علـي برجلـه ويمحطنــي بيــده علـى جبهتـــي..
وقال لي: شوف أنت ****.. وما راح تفهـم إلا بالدروس العمليــه.. ويطلــع جواله ويــدق.. وقال لي: شوف أنا هاللحين بأكلـم وحــده وتعلــم..
قلت: طيـــب..

وكلم.. وقال: هلا حياتي هلا عمـررررري هلا رووووحي.. أنا لــؤي حبيبـك ومجنووونك (( الحمدلله على العقل.. وين لؤي معــه.. والله لو أشوف وجهـه في أحســن الأحوال بعــد ما أعطيــه غيـر اسم جعـفــر.. قال إيش قال لـؤي))

وقام يقول لها: أحبــك وأمووووت فيــك.. أنا بدونك مثــل البيـت بدون حاره.. مثل التلفون بـدون حراره.. مثل السواق بدوون سياره.. أنا البنـزين وأنتــي الشراره.. أنا الشارع وأنتي الإناره.. أنا مبنى التجاره العالمي وأنتـي الطياره ((قســم بالله إني بغيـت أضمــه وأبوسه يوم سمعـت كلامه.. حسيت بشعور غريب يقطع إبليسه لو يكلم جدار كان ذااااب))

المهم.. إنه خلـص المكالمـه والتفـت لي وقال: يالله دورك.. بأعطيـك رقـم بنــت وكلمها وقول لها نفــس كلامي..
قلـت لـه بكـل خجـل: طيـب..
وهو اللي يــدق علــى بنــت ويعطينـــي الجوال عشان أكلمها وأنا اللي أقول: ألوووو..
ويوم سمعــت صوتها ضاعت علومي.. ونسيـت كل الكلام وقلت لها: بابا فيـــن!!
وما حسـيت إلا بذيـك الجزمـه اللي لازقـه في مقفاي..
وقال لي: قـول نفس الكلام اللي قلتـه يالثوووور..
وانا اللي اقول لهـا: هلا حياتي هلا روحي..
قالت: طيب وبعــدين..
قلت لها: أنا بدونك مثـل الكيبورد بدون فاره.. مثل التقاطع بدون إشاره .. مثـل ال**** بدون ****ه.. مثل السلطـه بدون خياره.. أنا محترف وأنتـي نظام الإعاره.. أنا الولاعه وأنتـي السيجاره.. أنا الددســن وأنتـي الغماره... أنا الصرصور وأنتـي البياره.. أنا.. طوووط طوووط طوووط طوووط ... قفلـت الخـط في وجهي..
قال عبدوش: وش فيــك ؟؟
قلـت لـه: لا أبــد الخــط مشغول ((ما يعرف يصرف أبــــد))
وما دريت إلا وعبدووش مطلــع لوح فيه مسامير ودبجنــي فيــه لين قلــت للعنــز ياخالة..

المهـم.. إني رجعــت للبيـت ودماني تصـب وماليه وجهـي من كثر الطق اللـي جاني مـن عبدووش لدرجة إن اللي يشوفني ما يعرفني.. طالع كنـي مسابقـة (مـن صاحب هــذه الصوره) اللي يحطونها في المجلات.. وأنا اللي أدخـل البيــت بشووويش عشان ما يشووفني أحــد.. وأطلـع غرفتي وأسكــر الباب وأنام... وفـي عــز النوم.. دق جرس التلفون وأرفع السماعه.. إلا هـي نفـس البنــت اللي كلمتنـي أول مره..
قلـت: نعــم..
قالت: سوسو موجوده؟؟
قلـت لهـا: شوفي.. بيتنا كلــه شباب.. وما فيه أحـد يبدأ اسمـه بحرف السيــن.. أنا وأخواني كلنا اسمنا خالد.. وما فيه إلا أخوي الصغيــر فهــد هو اللي اسمــه نايف ونناديه عبد الرحمن..
والبنــت كررتها ضحكــه.. وقالت: ما شاالله دمـك خفيــف ((هي تحسبني أستهبل مادرت إني دلخ من جد))
وقلــت لها: شكــراً (( مسوي مؤدب))

سـألتنـي البنــت: وش تسوي هاللحيــن؟
قلت لها: والله كنـت نايم...
قالت: يؤ.. يؤ.. تنام في الليل أنت؟
قلت: أجــل متـــى أنام؟
قالت: لا أنا أنام في النهار وأسهر في الليـل..
قلـت: ليـش الأخت بومـه!!
قالت: لا بس الليل وقـت الرومانسيه.. أنت تعرف الرومانسيه؟
قلت لها: لاوالله ما أعرف بنات ((مسوي فيها فاهم))
سألتنـــي: أنت وش اسمــك؟
قلت لهـا: مصيول..
قالت: وش معناه..
قلت لها: هذا اسـم كلـب كان عنــد جـدي وسماني أبوي عليـه لأنـي أشبـهه..
سألتها: وأنتــي وش اسمــك؟
قالت: داليدا..
قلت لها: أنا أبي أعرف اسمــك مو عيارتك!!
قالت: هــذا اسمــي (( هذوللي البنات تسألها وش اسمك تقول رهـف ولا شوق ولا أفنان))
سويت فيها أسلوب وقلت لها إني حبيت وحده بس انتهى هالحب.. لأن اللي حبيتها خانتني
قالت لي: من حبيـت؟
قلت لها: حبيـت عنـز جيراننا بس خانتني مـع تيــس سوري عشان لـه قــذلـه..
البنت قالت لي: أوكي أكلمك بكره لأن أمـي تناديني..
قلت: مو مشكلــه..

وتطورت العلاقه.. وصرنا نكلم بعــض كـل يووووم.. وأنا انقلــب حالي.. ولاحظوا أهلــي إنــي تغيــرت.. يعني نكون جالسين على الغـدا ولا العـشا وأنا ما آكــل.. سارح وأنغــف.. وبعـض المرات أنسى إصبعـي داخل خشمــي.. ولاحظوا أهلــي إنـي صرت مؤددددب وأقرا واجد.. وأنا أقرا عشان أعرف كلام جديد في الحـب.. تلقاني أقرا كتـب الشعــر والحب والطبـخ ((لا تستغربون لأن كتب الطبخ أتعلم منها كلام حلو بعـد مثـل ياعسـل.. ياحليـب.. ياقشطـه.. ياكريم كرامل))