هيمه

اللي يسمع غير اللي يجرب واللي جرب هيحكي … اللي تخاف منه مفيش أسهل منه ، هذه الحكمة أو المثل الذي كنت أسمعه زمان أيام الامتحانات كان مسيطراً على تفكيري طول الشهرين ونص اللي فاتوا ،وفعلاً ما كنت أخاف منه كان خطوة من أسهل خطواتي في الحياة ، قبلها فكرت فيه بشيء من خوف اقتناعي به وترييح دماغي من التكتيك والتخطيط وغيره … لكن .. سبحان الله الكريم ، لما حد بيقول لنا كلام عن الثقة بالله والأمل واحنا في مود مش تمام بنسمع الكلام وكأنه ديباجة محفوظة مللناها … لكن التجربة بتفرق كتير أوي





الكلام ده بعد سنين طويلة هيكون تتويج لتجربة شخصية وبرهان حقيقي لمسته بنفسي لكرم ربنا سبحانه وتعالى وفضله ورحمته بعباده ، الدعاء … الدعاء ده ليه قيمة ميحسهاش الا اللي يتعبد لربنا بحُب …اللي يحب انه يكون متوكل على ربنا فعلاً … انا مش هقدر اكتب كل اللي نفسي أقوله واكتبه … عايز بس أقول مرة واتنين وعشرة ان ربنا أكرم الأكرمين ورحمته أوسع من ضيق عقولنا ومحدودية تفكيرنا … ربنا بيقبل الدعاء والله ، ادعي من قلبك أوي وباللي نفسك فيه كله ومتتعبش نفسك وتتكلف في الدعاء .. ادعي لربنا زي ما بتتكلم بالعامية ، يارب انا عايز كذا يارب .. وسيب نفسك تعيط وانت في أشد الحاجة لربنا ، كلامي ده هي خواطري الشخصية ومش درس دين .. دي تجربة أنا مريت بيها شهرين ونص اتعلمت منها حاجات كتير جديدة ، حاجات كتير أوي بقى لها أثر عميق عندي وغيرتني كتير إلى حال كنت أتمناه … ربنا كريم ومن اعتمد عليه كفاه عن غيره ومن توكل عليه رزقه كما قال النبي صلى الله عليه وسلم .. والله لو توكلتم على الله حق توكله لرزقكم كما يرزق الطير تغدو خماصاً وتروح بطاناً





لا إله إلا أنت سبحانك إني كنت من الظالمين ، اللهم يا ودود يا ودود ياذا العرش المجيد يا فعالاً لما تريد اللهم يا مغيث أغثني ، أستغفر الله العلي العظيم من كل ذنب عظيم وأتوب إليه ، اللهم اجعل القرآن العظيم ربيع قلوبنا ونور صدورنا وجلاء همنا وذهاب حزننا ، لا إله إلا الله الحليم الكريم لا إله إلا الله العلي العظيم لا إله إلا الله رب السماوات السبع ورب العرش العظيم … المداومة على الأدعية دي والإلحاح على ربنا في الدعاء وتصحيح النية وعدم الخجل من ربنا لما نرجع ندعيه واحنا عصاة والأهم .. الأهم الثقة بأن ربنا هيستجيب الدعاء ..في ناس ربنا بيعجل لهم بالإجابة وفق حكمة يقدرها سبحانه وفي ناس ربنا يؤجل لهم الإجابة او تجيلهم بصورة أخرى





الكلام ده معروف ومسموع ، أنا بكتبه لأنه محسوس .. لأني حسيته وعيشته وشفت أثره واتعلمت منه ، لأني افتكرت ” من ذاق عرف ومن عرف إغترف ” … حاجات كتير في الشغل وحياتي كلها بتتغير بصورة لا يمكن تفسيرها إلا بحاجتين ، الأولى كرم ربنا .. والتانية دعوة أمي ليه اللي فعلاً بحس أثرها في حاجات كتير .. في قبولي لدى الناس ودي نعمة من ربنا، في تيسير أمور لم أكن أتخيل .. حتى التخيل انها هتيجي كده ، في قضاء ربنا وقدره اللي مكنتش بفهمه في وقته .. دلوقتي فهمت ليه ربنا بييسر أمور ويقدر لنا الخير فيها ويعسر أخرى ويجنبنها شرورها … ليه ربنا بيرزقنا بكيفية وقدر معين ميخليناش نطغى أوي ..تفسيرات شخصية جداً وتحليلات كانت قابلة لوجهة نظر أخرى لو كان في الأمر تعسير ، لكن في كل الأوقات لا يمكن أبداً ان الواحد يجحد فضل ربنا ويتنصل من عبوديته اللي فعلاً كلها اطمئنان ورحمة وتصالح نفسي يهون الحياة ولا يغيبنا عنها وييسر أمورنا فيها وان بدت عسيرة





أنا بحب ربنا أوي … أنا بعتز بديني أوي ، بعتز بقيمة الروح والعقل اللي من علينا بيهم ، بعتز بقيمة التوكل والأخذ بالأسباب ، بعتز بقيمة العقل ..فرحان إن ربنا خلقنا بقلوب فيها رحمة وإنسانية وحب بيزيد كل ما يزيد حبنا ليه





ربنا كريم أوي ، بجد …وبكلام انا حاسس انه طفولي شوية … إوعى تيأس واعتقد في الممكن أكتر من إعتقادك في المستحيل ، فكر واتعب … على رأي الدكتور إبراهيم الفقي .. عيش بالأمل عيش بالحب … بكره أحلى طالما عايزينه كده ، الدنيا أحلى طالما فيها رب إسمه الكريم … إوعى تخاف من حاجات بعيدة عنك ، قرب للي بتخاف منه وعامله عن قرب يمكن تلاقيك كنت خايف من وهم





حاجة أخيرة … قيمة الدنيا زي ما انا فاهمها تكمن في الحب ، حب ربنا ونبيك وأهلك ، حب كل حاجة بتعملها واتعلم ازاي تحب وازاي تحافظ ع الحاجات اللي بتحبها ، حب اللي بتكتبه وحسه وعيشه ، إكره الظلم والهوان والكسل وإكره أي حاجة بتضيع دماغك ومتضيعش نفسك ولا وقتك ولا حياتك في أي حاجة مفيهاش نفع ليك في الدنيا أو الاخرة… استمتع بكل وقتك ، اذكر ربنا وادعيه وقوله انا بحبك أوي ياربنا .. حب أهلك وحسسهم بده وضيق المسافات اللي وسعت بينك وبين أي حد بتحبه وبتحب له الخير … والله العظيم مفيش أحلى من حب ربنا والتوكل عليه … يارب نعيش بالحب … يارب نعرف نحب .. يارب نحب الجنة عشان نوصل لها … اللي بيحب حاجة بيحاول يوصلها … يارب نحب كل حاجة حلوة حتى لو عنينا مش شيفاها أوي ومحاولناش ندور عليها

__________________