وناستي مع البزارين ..!!

@ شموخ همة @ · 18-07-2007, 10:42 PM

( رجاءً موضوع خـــــاص للصديقات فقط ) لا نسمح بدخول الرجال..

.

.

.

.

وناستي مع البزارين.

وبعد موضوع المعاناة..
خطر في بالي الوجه الثاني مع البزران! وهي الوناسة..
يالله تمتعوا بالحلول الناجحة .. علشان تتونسوا معهم حييل !!
.
.
.
.
.

التسطير!!

لما يضيق صدري وأحتار وش أقضي وقتي فيه يا قرب البزران عندي..!
ضحك شوي وتسطير وتكفيخ شوي!

يعني أقضي وقت الفراغ! ( ساعة وساعة )..
مو كل شيء جد شوي نتونس .. تسطرني وأسطرها.. تقبصني وأقبصها!! " عاد مو جد يعني على خفيف مزح"!

إلا بنت أختي الصغيرة يا شين قبصها حااااار ما أدري يمكن علشان أصابعها صغيرة وأظافرها طويلة شوي..
لما تقبص كأنها ( محطةٌ بسوط )!!

أما التعكيش وارد كشش البزران أقرب شيء إذا سطرتس وانحااااشت تقدرين تلحقين على كشتها أو ( قشعتها ) مثل ما يقولون البدو الله يحفظهم..
.

.

.

الهبال والرقص !!

يعني في الغالب في المناسبات الأعراس والأعياد ( بدف)..
والأحيان القليلة في الأيام العادية ( بدون دف )..

لازم مع الجلسة في البيت نـملّ من التلفاز نغير ونشغل شريط..
وكلن واللي يحترف فيه.. طبعاً مو رقص رقص.. لكن بالأصح الهبال والوناسة وسعة الصدر ..
مع البزارين تعيشين فرحتين..
كلهم لا بسين ومكشخين ومتقطعين من الفرحة..
لما تعطينهم وجه مساكين يبون أحد يلتفت لهم - لما تصير كبيرة أو كبير معهم - ويالله ضحك ووناسة وهبال.
.

.

.

الطلبات والتوصيل بالمجان!!

استغلي الفرصة إذا كانوا معندين قولي: تبوني ألعب معكم جيبوا لي موية، جيبوا لي كذا،.... وعلى طول ينفذون طلباتك بدون وجع راس .. "حل ناجح" !!

بس عاد لا تصيرين زولة مرة! ..
يعني أحياناً إذا بغيتي تدلعين نفسك !
يعني دايم أنتي تطبخين وتوصلين وتغسلين.. وسعي صدرك شوي ما في حرج..
وخاصة إذا كانوا غثيثين شووي!!
ومصدقين أنفسهم!!
.

.

.

التلفاز !!

إذا بغيتي تشوفين التلفاز وأنتي مرتاحة قولي: نحن لنا المساء وأنتم الصباح!
خخخخخخخ أصلاً ما يقومون بدري!!

وإذا جاء برنامج مهم بالنهار حطي عليه وقولي أنا متابعة البرنامج لا حد يكلمني!
عاد لازم تجي إزعاجات لكن أقل من الصياح والإزعاجات..

يعني يروح النهار وما شفتي شيء ينفعك!!!
مو على كيفهم.. ولا يكثر!! (يعني ميد البزران)..
.

.

.

الســـواليـف !!

مع البزارن شيء ثاني يا زين سواليفهم زيناه.. اللي أعمارهم ( سنتان ثلاث أربع ) يهبلون..
قولي لهم يقصون عليك قصة..
أي شيء قدامهم يدرجونه من ضمن القصة..
يطلع لك بيت متكامل مو قصة!!
.

.

.

النــووووم !!

إذا تبين تنومين ولا فيك النووم في طريقة حلوووة مرة..
قولي: يا فلانة يعني (بزرة)! يا كوفيرة.. تصلحين لي تسريحة..

ما يسمعن تسريحة إلا ويتطاقن عليك !!
خليها تمشط شعرك تسوي أي تسريحة تبي !!

شوي إلا تحسين فيك النوم وعيونك تغمض..
قولي: خلاص يا كوفير.. بكرة كملي.. ألحين فيني النووم!!
وروحي نووومي على طول..

ــــــــــــــــــــــــــــــــــــــــــــــــــ ـــــ وليلة سعيدة ،،

() ويوم حــافل بالــونـــاســة ()

وأخيراً خذي رابط الوجه الأول من:

معاناتي مع البزارين..
للي ما سبق اطلعت عليه:

http://muntada.islamtoday.net/showth...D2%C7%D1%ED%E4

أروى عبد الله · 18-07-2007, 11:09 PM

واو ياحبي للبزارين يهبلون

فعلاً قمه الوناسه تلقينها معهم

الله يحفظهم

جهوده · 19-07-2007, 04:20 PM

زينة الدنيا هم الاطفال وبيت مافيه طفل الله يكون في عون اهله

بسماتهم تجعل للبيت حياة

وضجيجهم وحركاتهم تنعشك

الله يخلي بزاريننا وبزارينكم وبزارين المسلمين

ويرزق الله من حرم هذه اللذه

اللهم اااااااامين

هدوءظل · 19-07-2007, 05:43 PM

[QUOTE

النــووووم !!

إذا تبين تنومين ولا فيك النووم في طريقة حلوووة مرة..
قولي: يا فلانة يعني (بزرة)! يا كوفيرة.. تصلحين لي تسريحة..

ما يسمعن تسريحة إلا ويتطاقن عليك !!
خليها تمشط شعرك تسوي أي تسريحة تبي !!

شوي إلا تحسين فيك النوم وعيونك تغمض..
قولي: خلاص يا كوفير.. بكرة كملي.. ألحين فيني النووم!!
وروحي نووومي على طول.. [/color]

ــــــــــــــــــــــــــــــــــــــــــــــــــ ـــــ وليلة سعيدة ،،

() ويوم حــافل بالــونـــاســة ()
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ
والله انتحار

..مولعب ..الاالشعر ..يبدعوون فيه صح ..

خادمة القرآن · 21-07-2007, 08:25 AM

أسعدك الله 000
بس متأكدة إنها حلول ناجحة 000ولا ترى يا ويلش :d

@ شموخ همة @ · 21-07-2007, 10:19 AM

ترانيم،،

أم المجاهدين،،

شكراً لكن وتقبل دعواتكن..

يحفظكن المولى

@ شموخ همة @ · 21-07-2007, 10:31 AM

هدوء ظل ،،

تشكرااات..

خادمة القرآن ،،

ايه أكيد ناجحة بالنسبة لي مجربتها ولا كان ما كتبتها هنا.. (وحدة مصدقة أنها حلول جهنمية)

تشكرااات

دموع الأسحار · 25-07-2007, 12:00 PM

مع إني ما فهمت نصف اللهجة

لكن وصلتني المعاني ..لأن المأساة واحدة

أنا أضحك وبنتي ( ثلاث سنين وشوي ) تضحك معاي

تقولي فاهمة ليش أضحك ..

بعدين قلت لها جيبي لي ماء حتى ألعب معاك

طيران راحت تجيب لي موية

تسلم إيدك يا أختي الغالية

@ شموخ همة @ · 25-07-2007, 12:13 PM

تشكرااات دموع الأسحار..

شفتي جيبي لهم طاري اللعب وعلى طول ينفذون اللي تبين..

ريوف · 26-07-2007, 05:21 PM

اقتباس:

]أنا لم أفهــــــــــــــــــــــم أى شئ

هههههههه

ياحياتي انتي

حاسه فيك
جربت انا هذي المعاناة اني ماافهم اللهجه ..لكن ابشري راح اعلمكي لها

طالعي سلمك الله الغاليه :شموخ همة تحب الاطفال

وتقول ان سعادتها ويا الاطفال ((يالغاليه ياشموخ تحبينهم يمكن لان اطفالكم هادين اما احنا اشبه بفرعون

اولا تقول السعاده في التسطير يعني الطق بالفصحى يعني الضرب

انها لما تطق الاطفال تحس بفرحه . يعني تطقهم ويطقونها ...((والله انج رهيبه هذا احسن شي انك تطقينهم )

الرقص والهبال

انها تشغل لهم شريط كاسيت وتعيشهم جو الفرح والعرس

الطلبات والتوصيل بالمجان!!

(هذا احسن شي )

توصيل الطلبات ..انها تامر وتنهي

**

اوكي نكتفي بهذا القدر من الترجمه ...ولنا عوده باذن الله

شكرا شموووووووووووووووووخ همه ...

ريوف بنت محمد [/color]